Apni shandaar adakari ke baais pehchane jaane walay bollywood adakar Nawaz-ul-din aur Pakistani TV dramon ki mashhoor adakara Aisha Khan aik baar phir Pakistani ishtihar mein jalva gir hue, Is ishtihar mein un ka diya howa pegham shadi shuda Hazraat ke liye bohat mufeed ho sakta hai .
kuch arsa qabal release honay wali bollwood film"Raees" mein behtareen adakari par bhar poor pazeerai panay walay Nawaz-ul-din ko har brand apne ishtiharaat mein shaamil karne ka khawahish mand nazar aata hai.
Kenwood brand ke AC ki tashheer karne walay is ishtihar mein dono adakar miyan biwi ke tor par nazar aeye. Apne ghar aeye mehmanon ki maizbani karte hue Nawaz-ul-din ne woh ghalti kar di jis se kisi bhi shohar ko baz rehna chahiye .
Khanay ki table par jab maheman Aisha Khan ki Cooking ki tareef mein masroof they, Ain isi lamhay Nawaz-ul-din yeh keh utthay ke sab se mazedar dish beryani to un ki biwi ke bajaye ghar ki cook ne banai hai.
Magar phir Aisha Khan ke ghornay ne Nawaz-ul-din ko un ki ghalti ka ehsas dila diya aur woh apni baat ko badalty dikhayi diye. Ishtihar ka asal pegham tamam Shadi shuda hazraat ke liye yeh hai ke jab koi khana pakanay par un ki biwi ki tareef kar raha ho to woh khamosh rahen !
Kenwood ke is ishtihar ki aks bandi Dubai mein ki gayi aur yeh is silsilay ka dosra ishtihar hai . Is se qabal feb mein anay walay ishtihar mein bhi Nawaz-ul-din ko apne ghalat mushahiday ka nateeja bughatte dekhaya gaya tha.
0 comments: